Робототехникадан өткен "Ашық есік" күні

     Ғылымның қарыштап дамыған кезеңінде робототехника саласы да қарқынды да­мып келеді. Қазіргі таңда білім кеңістігіне робо­тотехника ғылымы саласы енгізіліп, оқушылардың сын тұрғы­сы­нан ойлауын дамытуға және шығармашылықпен ойлауына мүмкіндік беруде.

Алғаш рет бір комплект роботоконструкторды Талдықорған қаласындағы І.Жансүгіров атындағы Жетісу мемлекеттік университеті сыйға тартып, өткен оқу жылында Робототехникадан байқау ұйымдастырғанда М.Арын атындағы №24 лицейдің информатика пәнінің мұғалімі Б.Құрманәлінің жетекшілігімен 9, 10 сынып оқушыларынан құралған үйірме мүшелері қатысып, «Сумо», «Траектория», «Шытырман» бойынша жүлделі 1-орынды иеленіп, тағы бір комплект робот бөлшектерін жеңіп алған еді.

     Жақында Талдықорған қаласындағы №1, №2, №5, №6, №8, №18 мектептері үшін Робототехника саласы бойынша «Ашық есік» күні өтіп, робототехника жасаумен айналысатын үйірме мүшелері 10а сынып оқушылары Долаев Тоқтар, Тұрысбаев Арын, 9ә сынып оқушысы Құдайберген Әлішер, 6б сынып оқушысы Қайратұлы Ильяс «Шытырман» (Лабиринт) жолдардан жүріп өтетін робот пен «Футбол» ойынын ойнап қақпаға доп соғатын роботтарды Ашық есік күнінде көр­се­тіп, оқушыларға жұмыс жасаудың әдіс-тәсіл­дерін, электрондық құрылғыларды компьютер­лік программа арқылы құрастыру және пультпен басқару үрдісін таныстырды.